Sowat 120 vroue van Modimolle, die omliggende gemeenskap en selfs uit Gauteng het op Saterdag 12 September by die Abraham Koffiewinkel saamgekuier tydens Abraham Kriel Kinderhuis Nylstroom se Vonkelvrou-damesoggend.

Die geleentheid wat deur Gerda van der Merwe en Annie le Roux gereël is, het die vroue ʼn oggend van inspirasie, humor en lekker saamkuier gebied. Terselfdertyd is die werk van die kinderhuis ondersteun.

Esté Pienaar, hoof van Scherzo Dramaskool en ʼn voormalige onderwyseres, was een van die gassprekers. Met haar kenmerkende humor en persoonlike staaltjies het sy die oud en jonk behoorlik laat skaterlag. Tussen die humor deur het sy haar gehoor ook daaraan herinner om die lewe nie altyd té ernstig op te neem nie en die mooi in gewone oomblikke raak te sien.

Hanna de Kock, ʼn voormalige inwoner van Abraham Kriel Kinderhuis Nylstroom, se boodskap het weer ʼn heel ander, persoonlike betekenis gehad. Dié keer het sy as gasspreker teruggekeer na ʼn plek wat deel van haar eie verhaal is.

Gaskunstenaar Bernice het die gehoor met haar pragtige sang betower. Maar dit was 20 van die kinderhuis se dogters wat die kollig tydens ʼn spesiale modeparade gesteel het. Die meisies, onder wie die jongstes net twee jaar oud was, het met groot selfvertroue oor die verhoog gestap, heupies geswaai en onder luide applous die gehoor se harte gesteel.

Ook agter die skerms het die kinderhuis se meisies ʼn belangrike rol gespeel. Die eetgoed vir die oggend is deur dogters van die Kinderhuis se Bakskool voorberei. Die Bakskool is ʼn passieprojek van Gerda, die uitvoerende hoof, waar sy die dogters praktiese bakvaardighede leer en hulle die geleentheid gee om hul talente te ontwikkel.

Gerda sê die sukses van die dag was te danke aan ʼn span wat nooit huiwer om ekstra moeite te doen nie: “Ek is ongelooflik dankbaar vir elkeen wat gehelp het om hierdie dag moontlik te maak. Die mense van die kinderhuis is altyd bereid om meer te doen as wat van hulle verwag word. Almal spring in, help waar hulle kan en doen dit met ʼn oop hart.”

Sonya Beukes, een van die gaste uit Gauteng, het die oggend as inspirerend beskryf: “Ons het lekker gelag en heerlik saamgekuier, maar daar die dag het ook warmte en betekenis gehad. Om daardie 20 dogters so selfversekerd op die verhoog te sien, met die wete dat hulle elkeen reeds ʼn hartseer en moeilike pad moes stap, het my diep geraak en my trane vlak laat sit. Dit is so belangrik om die werk te ondersteun wat by hierdie kinderhuis gedoen word.”

Die Vonkelvrou-damesoggend was nie net ʼn viering van vroue nie, maar het ook die kollig laat val op die geleenthede, ondersteuning en hoop wat die kinders van Abraham Kriel Kinderhuis Nylstroom help om met moed en selfvertroue na die toekoms te kyk.