Inspirerende toekoms – WRSA Loopbaanoriënteringsdag maak deure oop vir Abraham Kriel Kinders
Op Vrydag, 19 September 2025, het die kinders van die Abraham Kriel Kinderhuis in Nylstroom ʼn unieke geleentheid gekry om verskeie loopbaanrigtings te verken tydens ʼn loopbaanoriëntasiedag wat op die Wild- en Gasvryheidsbedryf gefokus het.
Die geleentheid is aangebied by Shekinah Lion and Game Lodge naby Vaalwater en is gefasiliteer deur die WRSA Lephalale se streekbelanggroep (RIG) onder leiding van Paul Booyens en Nicky Bothma.
Deur die loop van die dag is die deelnemers bekendgestel aan ʼn wye verskeidenheid loopbaangeleenthede binne hierdie dinamiese sektore. Boeiende aanbiedings en persoonlike verhale van beroepslui het praktiese insigte gekombineer met inspirasie en hoop vir die toekoms.
Na afloop van die sessies het Shekinah Lion and Game Lodge die groep bederf met ʼn onvergeetlike Bosveld-ervaring wat roofdierbesigtiging, ʼn heerlike ete en ʼn opwindende wildbesigtigingsrit deur die reservaat ingesluit het.
Die dag was ʼn enorme sukses en die jong deelnemers is toegerus met kennis, bemoediging en selfvertroue om hul drome met oorgawe na te streef.
Die Abraham Kriel Kinderhuis spreek ʼn opregte woord van dank uit aan die borge wat hierdie inisiatief moontlik gemaak het: WRSA, Matlabas Reserve, Cheetah Safaris, Shekinah Lion and Game Lodge, Wildman Lephalale, Pick n Pay Lephalale en Beyond Bush Venison.
Julle ruimhartigheid en toewyding aan gemeenskapsontwikkeling het aan hierdie jongmense meer as net ʼn dag van leersame bedrywighede gegee – julle het vir hulle inspirasie en ʼn visie vir die toekoms geskenk.